Skjalasafn Seðlabanka Íslands tilheyrir svokallaðri skjalastöð sem sett var á fót í bankanum árið 2004 og er til húsa í aðalbyggingu bankans, Kalkofnsvegi 1, og í Einholti 4. Skjalasafnið tilheyrði áður safnadeild bankans.

Seðlabanki Íslands hóf starfsemi 7. apríl 1961, og um leið tók skjalasafn bankans að myndast. Um tuttugu ára skeið, frá 1961 til 1981, stóðu Seðlabankinn og Landsbanki Íslands saman að rekstri skjalasafns þar sem varðveitt voru skjalagögn bankanna beggja allt frá stofnun þeirra. Árið 1981 varð breyting á samstarfi bankanna um þetta, en það ár var gerður samningur þeirra um að bókhaldsbækur og skjöl Landsbankans frá fyrri tíð skyldi varðveita áfram með skjalasafni Seðlabankans þar til annað yrði ákveðið. Landsbanka Íslands var fengið formlegt hlutverk seðlabanka með Landsbankalögunum 1927-28, og fór hann með það þar til Seðlabanki Íslands var stofnaður. Skjöl bankans allt frá stofnun og fram til ársins 2002 eru vistuð í skjalasafni í Einholti 4, en nýrri skjöl í skjalasafni á Kalkofnsvegi 1.

Önnur starfsemi í skjalastöð bankans er eftirfarandi:

Flokkun, skráning, vistun og dreifing rafrænna skjala og pappírsskjala.

Rafræn skjalavarsla

Rafrænt skjalakerfi var tekið í notkun í bankanum í byrjun ársins 2002 og fékk það nafnið Hirðir. Skjalakerfið byggir á áströlskum hugbúnaði (DME) og sérsmíðuðum íslenskum hugbúnaði. Notendur rafræna skjalakerfisins eru starfsmenn bankans sem fást við almenna skjalagerð og bankastjórar. 

Heimilisföng, símanúmer, netfang:
Kalkofnsvegur 1, 150 Reykjavík
Sími: 569 9843
Einholti 4, 105 Reykjavík
Sími: 569 9961
Netfang: skjalasafn@sedlabanki.is